Sælir kæru foreldrar
Nú er desember kominn með öllum sín samverustundum og gleði.
Töluvert hefur borið á kvef og hitapest hjá okkur síðustu vikuna og einhver börn hafa fengið gubbupest.
Við teljum niður dagana til jóla á Gulu deild með bókadagatali. Þá er opnaður einn pakki á hverjum degi, í sögustund eftir kaffi. Í hverjum pakka er bók sem síðan er lesin í sögustundinni. Þetta vekur mikla lukku hjá börnunum.
Við förum út alla daga og látum veðrið helst ekki stoppa okkur með elstu börnin. En við metum veðrið alla daga fyrir Rauðu-deild, sérstaklega í skammdeginu. Við höfum samt verið nokkuð heppin með veður og ekki margir dagar sem við höfum þurft að vera inni.
Á miðvikudaginn var Rauður dagur hjá okkur og gaman að sjá hvað margir mættu í rauðu.
Eftir leikskóla á fimmtudaginn stóð foreldrafélag Hnoðrabóls fyrir brúðuleiksýningunni „Pönnukakan hennar Grýlu“ í Logalandi. Það var vel mætt og hin besta skemmtun.
Í dag, föstudag, bökuðum við piparkökur og buðum foreldra velkomna að aðstoða okkur við baksturinn. Það var vel mætt og mikil gleði við baksturinn. Að bakstri loknum dönsuðum við í kringum jólatréið og gæddum okkur svo á nýbökuðum piparkökum í kaffitímanum.
Næsta vika verður líka þéttskipuð af jólaföndri og skemmtilegu uppbroti.
Á miðvikudaginn verður jólamatur að hætti Emblu og dansað í kringum jólatréið.
Á fimmtudaginn verður kirkjuferð. Sr. Geir býður leikskólabörnum í heimsókn í Reykholtskirkju kl. 15:30. Ferðin er valfrjáls og fara börnin hvert með sínu foreldri. Foreldrar koma og sækja börn sín í leikskólann og er brottför héðan kl. 15:15. Öll fjölskyldan er velkomin með. Við viljum biðja þá sem ekki sjá sér fært að koma með að láta deildarstjóra vita af því.
Við vonum að þið njótið aðventunnar jafn vel og við erum að gera.
Bestu kveðjur með sól í hjarta frá starfsfólki Hnoðrabóls.